الكلام اللي هيتقال ده مهم جدًا جدًا و أرجوكم حاولوا تستفادوا منه على قد ما تقدروا و ياريت تفيدوا غيركم بشير البوست أو بنقل معلومات منه…

الموضوع متعلق بفيروس بدأ ينتشر بين الجنس البشري في الأونة الاخيرة و الفيروس ده اتسمى بأسم كورونا لأنه من سلالة فيروسات كورونا و في الحقيقة هو فيروس جديد و مالوش علاج و هتعرفوا تفاصيل اكتر و اكتر لما تقرأوا الكلام ده، بس قبل ما اتكلم عن أي حاجة .

  • حابب اتكلم في نقطتين مهمين بخصوص فيروس كورونا :
  • أولًا…
  • الموضوع خطير و ياريت الناس تهدى و تبطل هبد و ركوب تريند لأن الوضع لا يحتمل، يعني مثلًا هنلاقي واحد في بوست بيقول..لا لا ده فيرس امريكا اللي عاملاه و يرد واحد يقوله لا دي الصين اللي عاملاه و يجي واحد تالت خالص يقول لا ده اصلا مفيش منه ضرر ولا قلق و انتوا بس اللي مكبرين الموضوع و الحكومات و الاعلام هم اللي مديين الموضوع أكبر من حجمه (يا راجل..احلف كده!)
  • طب ازاي و معظم دول العالم اعلنت حالة الطواريء و من كام يوم خرج رئيس وزراء بريطانيا و قال ودعوا احبابكم و طبعًا كلنا تابعنا على شاشات الاخبار عدد المصابين و الوفيات في إيران و إيطاليا و قبلهم الصين و غيرهم…
  • اعذروني الموضوع حقيقي كبير و احنا امام فيروس لا عارفينله علاج ولا عارفين هو أيه أصلًا.

ثانيًا….

  • دول كتير اخدت حذرها و علقت الدوام (العمل او الدراسة) لحين أشعار أخر بسبب انتشار فيروس كورونا و ده مش مجرد أجراء وقائي لأ، المرض خطير و بينتشر بسرعة زي انتشار النار في الهشيم فياريت نحترم عقول بعض شوية و نبطل كلام عن نهاية العالم و نركز في اللي احنا بنواجهه عشان نقدر نواجهه لأنه حقيقي عدو و عدو خطير كمان،
  • أما بالنسبة لوسائل الأعلام و للحكومات و للمسؤولين في مصر أو خارجها ف انا بتمني مثل ما بننشر ازاي نحمي نفسنا من فيروس كورونا فياريت ننشر توعية بأننا ازاي نواجهه،
  • يعني المفروض بدل ما نقول انا اقدر احمي نفسي بكذا ف احنا ممكن نقول انا اقدر احمي نفسي بكذا و لو اتصابت هحس بكذا و المفروض لما احس بالأعراض دي اتجه للجهة المعينة دي،
  • الموضوع يكون منظم اكتر من كده شوية لأن كده تهريج و هرجلة و ماحدش عارف يروح فين ولا الأعراض اللي عنده هل هي انفلونزا موسمية ولا كورونا، و لذلك ف انا هوضح لحضارتكم شوية نقط مهمة اتمنى انها تكون بتساعد و لو في جزء من مواجهة الفيرس…

أولًا أيه هو فيروس كورونا (اللي بنواجهه حاليًا) ؟!

  • هو فيروس من انواع الكوراناويات المستقيمة و اللي بالمناسبة يعني تم اكتشافهم سنة ١٩٦٠، و لأنه فيروس ف الفيروسات من طبعها انها في تطور مستمر زيها زي حضرتك بالظبط علشان تقدر تواجه التغيير المناخي اللي حواليها علشان ببساطة تقدر تعيش و الفيروس اللي احنا بنواجهه حاليًا هو نوع جديد من انواع فيروس كورونا اتسمى ب(n cov -2019).
  • لأنه ببساطة ظهر من قريب و دي المشكلة، المشكلة أنه فيروس جديد ف احنا كبشر مأخدناش الوقت الكافي في أننا نتعرف عليه أو نجري عليه اختبارات عشان نلاقي له علاج و طبعًا الذعر اللي حاصل بسبب انه انتشر بسرعة رهيبة و دي المشكلة اللي بتواجهنا، احنا دلوقتي قصاد فيروس جديد و بينتشر بسرعة زيه زي البرد أو الأنفلونزا الموسمية .
  • طبعًا مش محتاج اقول لحضارتكم أن لحد اللحظة اللي احنا بنتكلم فيها دي مافيش علاج ولا لقاح للقضاء عليه و بالمناسبة بس حابب اوضح أن المضادات الحيوية مابتأثرش عليه…

ما هي أعراض الاصابة بفيروس كورونا ؟

  • أولًا اعراض المرض زي أعراض الأنفلونزا و إن كانت أكثر حدة و شراسة، و لذلك إن وجب التنويه يعني لو حضرتك حسيت بضيق في التنفس أو سعال أو أي عرض من أعراض الأنفلونزا الموسمية ف ياريت حضرتك تروح لأقرب مستشفى عام و تحلل فيها تحليل الكورونا.

كيفية انتشار فيروس كورونا وكيفية حماية نفسي ؟

  • حضرتك يا سيدي الفاضل لو حسيت أو ماحستش بالأعراض ف انت لازم (و بقول لازم مش ياريت لأنه واجب و فرض) ماتقربش من حد زيادة عن اللزوم ولازم كمان تعتني بنظافتك الشخصية و تمشي على تعليمات النظافة الشخصية اللي كانت بتبقى موجودة في ارشادات كتاباتك المدرسية زمان،
  • اتمني لو حضرتك خليت أي حد من قرايبك كبير في السن (لأن المرض ببساطة بيموت كبار السن و المرضى بأمراض مزمنة و ده مش كلام مرسل دي حقيقة) أو أي طفل مايخرجش من البيت لحد ما تطلع لنا بيانات مفصلة بطرق علاج للفيروس بعد أذنك يعني.

طب لو انا عندي كورونا هموت ولا ممكن اخف؟!

والله يا سيدي الفاضل الأعمار بيدي الله و كلنا هنموت لكن الحقيقة أن الفيروس بيؤدي للوفاة و بالنسبة للحالات اللي خفت فهي خفت من تلقاء نفسها و ماخدتش أي علاج محدد ساعد في الشفا و لذلك في معلومات مهمة لازم نتكلم فيها…

أولًا : عدد المصابين مقارنة بعدد البشر عدد قليل و مايدعوش للذعر و خصوصًا أن الحالات اللي خفت أكبر بكتير من الحالات اللي ماتت و ده بيوضح أننا مش قصاد كارثة كبيرة اوي يعني (لحد دلوقتي) و لكن على الجانب الأخر تصاريح منظمة الصحة العالمية بأن الفيروس وباء و تصاريح المسؤولين في معظم الدول بيدل على أننا داخلين على كارثة و بيني و بينكم احتمال كبير تكون الاعداد دي اقل بكتير من الأعداد الحقيقية لأن انا أو انت ممكن جدًا نكون مصابين و احنا نفسنا مانعرفش!

  • فيروس كورونا انتشر بسرعة و بكمية تخض حقيقي و الموضوع لا يحتمل هزار ولا فتي ولا كلام مرسل و لا دخول في سياسة عشان لم تفاعل و خلاص، بالله عليكم احترموا عقول الناس و قولوا كلام مفيد نقدر نستفاد منه و الناس كمان تستفاد، حقيقي الناس خايفة و قلقانة و اه الموضوع يستدعي الخوف و القلق و الحذر .
  • لكننا برضه لازم نفكر بمنطقية و نحاول نلاقي حل أو سفينة نوح اللي تنجينا من بحر الشك و القلق اللي احنا عايشين فيه ده، انا اعرف معلومات كتير و قريت عن الفيروس من مواقع كتير جدًا جدًا و عرفت من أصدقائي الدكاترة كتير لكن انا بطلب من حضرتك انك تبحث و تدور و مش هحطلك مصادر لكلامي..
  • (دور انت بنفسك عن المصادر و اقرا و اعرف اكتر و اكتر…انا كاتب و بكتب مقال مش اله و بكتب كلام مقدس).

 

  • أسف لو طولت بس حقيقي الموضوع مقلق و ماقدمناش غير اننا كلنا ندعي ربنا انه ينجينا من فيروس كورونا ممكن اوي يكون طاعون العصر الحديث، ربنا يعافيني و أياكم و الف شكر لوقتكم و أرجوكم لو استفدتوا من الكلام ف ياريت تشيروه عشان غيركم يستفاد و ياريت كمان نحاول نبعد عن التجمعات
  • اذا أمكن يعني و نشتري كمامات مش عيب والله و اللي يتنمر عليك و انت لابسها اضحكله بسخافة و سيبه و امشي، و انا مفيش في ايدي حاجة غير أن انا ادعي ربنا و اتمنى أن يحصل شيء جديد يغير كل حاجة و الوضع يتحسن و ألا هنكون حقيقي في كارثة أكبر من اللي احنا فيها دلوقتي….أدام الله عليكم نعمة الصحة.

فيديو عن الوقاية من فايروس كورونا 

إقرا ايضا “

4 تعليقات

  1. تسلم ع النصائح اللي من القلب وربنا يسترها علينها من فيروس كورونا وكل الناس

  2. طيب اهم بوست بقه فى كل بوستات التوعيه اللى نشرتها قبل كده…
    دلوقتى عندك حد ف البيت سخن ..او بيكح ..تعمل ايه؟….
    بروتوكولات العالم كله بتقول ان المستشفيات كانت سبب اساسي فى عدوى الناس …وان اكتر من نص المصابين فى العالم اتعدوا بسبب انهم جروا ع المستشفى لما جالهم دور برد عادى …لانهم خافوا وافتكروه كورونا….
    يعنى….عندك برد ..رشح ..زكام…كحه ببلغم ..تقعد ف البيت ..وتشرب سوايل دافيه و تاخد علاج….
    عندك سخونه …تاخد حاجات للسخونه و تعزل نفسك ف بيتك ومتخالطش ناس …
    نروح المستشفى بس فى حاله انك مش عارف تاخد نفسك مع كحه ناشفه فيه تاريخ مخالطه لحد مصاب او راجع من بره…والاحسن بردو ف الحاله دى انك تتصل ب ١٠٥ وهما يوجهوك تعمل ايه….
    بلاش اطلاقا نروح نكشف ع اطفال ولا كبار لاسباب تافهه دلوقتى …
    يعنى طبعااااا مش وقته خااااالص انك تروح علشان حبوب و شعرى بيقع و حساسيه جلد و بطنى بتوجعنى و العيل رجع مره واحده و عنده انيميا وعنده ديدان وعنده اسهال…. و…..لاااا ده مش وقته خااالص…
    صدقونى جو المستشفى نفسه فى حالات الوباء بيبقى معدى …ومهما عملت من احتياطات هتتعدى و هتعدى بيتك واولادك ….
    ارجوكم ….فى الوقت ده بلاش مستشفى الا للشديد القوى….بلاش بجد ….
    احنا لما بنرجع من المستشفى ومن غير ما نشوف عيانين حتى بنبقى خايفين نلمس اى حاجه واى حد ….بس احنا مجبرين نروح لكن انت لا…

Comments are closed.