انا موظف استقبال في حالات الطوارئ ( 666 ) كل المطلوب مني إني ارد على المكالمات اللي بتطلب مساعدة ودوري انا اوصلها للإدارة الميدانية هي اللي بتبعت شرطة مختصة لمكافحة الجرائم “.

ساعات كتير بيجيلي معاكسات حد بيكون ظريف وعاوز يهزر ويطلب مني أوصله عربية شرطة عشان تساعدوا من

حد اقتحم بيته وفي الاخر بكشف بخبرتي أن ده معاكسة مش بلاغ حقيقي …

المكالمة دي أغرب مكالمة أنا استقبلتها طول عملي موظف استقبال ..

كانت الساعة ٢ بعد نص الليل جات لي مكالمة ,, وده نص المكالمة !

المتصلة: أرجوك ساعدني في حد اقتحم بيتي وانا خايفة اوي .
موظف الاستقبال: حاولي تهدي خالص واهم حاجه تكوني في مكان آمن .
المتصلة: انا في الدور العلوي وقفلت على نفسي الاوضة بس انا سمعه صوت تكسير حاجات تحت وحركة غريبة .
موظف الاستقبال: خليكي زي ما انتي واهدي خالص , عاوز منك شوية معلومات بسيطة عشان اوصلها مع البلاغ
عاوز عنوانك بظبط واسمك وهل في حد متواجد أو عايش معاكي في البيت .
المتصلة: انا عايشه لوحدي و عنواني ( …. )

بعد ما خدت المعلومات دي منها عملت زي ما متعود أني وصلت البلاغ للجهة المختصة وفي اقصى حد بيكون نص ساعة وبتوصل عربية الشرطة للمكان , طلبت منها أنها تفضل معايا على الخط .

وقلت لها: في أي صوت غريب أو أي حركة لسه سمعاها برة .
المتصلة: لأ الوضع هادئ دلوقتي .. لا لا الصوت انا سمعاه دلوقتي عند طرقة باب الاوضة من برة .
في اللحظة دي صوت المتصلة اتقطع وسمعت صوت خبطة قوية جداً
قعدت اكلمها واقولها: إيه اللي بيحصل دلوقتي عندك قوليلي انتي في امان دلوقتي . عربية الشرطة خلاص على وصول .
المتصلة: المقتحم بيحاول يكسر الباب انا خايفة اوي , الصوت وقف دلوقتي , انا هحاول اخرج برة اشوف إيه إللي بيحصل برة ..
قلتلها: ارجوكي خليكي مكانك وما تتحركيش ده هيعرضك لخطر ,, صوت صمت بعدها بشوية صوت المتصلة بتصرخ !
اتكلمت عشان أحاول اتواصل معاها: انتي سمعاني إيه الصوت ده , خلاص عربية الشرطة قريبة من البيت , حاولي تدفعي عن نفسك او تهربي لأقرب مكان آمن !
صوت المتصلة رجع تاني : هو طلع هو انا مش قدرة اصدق , ده ده هو جورج ,اتفاجئة من كلامها ده عشان كده
قلتلها: هو مين .. مين جورج ده .. مش انتي بتقولي انك عايشة لوحدك يطلع مين جورج ده
المتصلة: ده ده جورج زوجي , ومش المفروض أنه يظهر أو اشوفه لأنه ميت!!! …
وانا اللي قتلت جورج بأيدي من سنتين !!
كنت مضطرة اني اعمل كده .. كان بيعاملني وحش اوي وهو السبب في موت ابني .. ما كنش لازم يعيش .. جورج شيطان ماشي على الأرض … بس حتى بعد ما مات مش عاوز يسبني في حالي ….
ابعد عني اااااااااااااه !
صرخة قوية فزعتني !
تيت تيت تيت .. انتهت المكالمة

الشرطة وصلت البيت لقيت جثة لوحده ست في التلاتين من العمر جسمها مفهوش حتة سليمة
كانت مرمية على الأرض في الاوضة العلوية .. وما كنش في اي اثار اقتحام في البيت كله ولا حتى الأداة اللي تم استخدمها في القتل .